जनस्वास्थ्य कार्यालय काठमाडौं प्रदेश स्वास्थ्य कार्यालयमा रुपान्तरित

 अावाज स‌‌वाददाता     ४ मंसिर २०७५, मंगलवार

स्वास्थ्य सेवाको सङ्घीय संरचनाअनुसार जिल्ला जनस्वास्थ्य कार्यालय काठमाडौँ आजदेखि विधिवत् रुपमा प्रदेश स्वास्थ्य कार्यालयमा रुपान्तरित भएको छ।

सो कार्यालयले काठमाडौँसहित ललितपुर र भक्तपुर जिल्लाको स्वास्थ्य सेवाको समन्वय गर्नेछ। तीन नं प्रदेशका सामाजिक विकासमन्त्री युवराज दुलालले आज यहाँ आयोजित कार्यक्रममा प्रदेश स्वास्थ्य कार्यालयको शुभारम्भ गर्दै अगामी दिनमा स्वास्थ्य सेवा प्रभावकारी रुपमा प्रदान गरिने चर्चा गर्दै अन्य पाँच स्थानमा छिट्टै यस्ता कार्यालय सञ्चालनमा आउने जानकारी दिए।

सो अवसरमा प्रदेश स्वास्थ्य कार्यालयका प्रमुख कृष्णबहादुर चन्दले स्थानीय तहले सञ्चालन गर्ने र गरिराखेका स्वास्थ्य सेवाको अझ प्रभावकारिताका लागि कार्यालयले समन्वयात्मक काम गर्ने जानकारी दिए।

तीन नं प्रदेशले यसअन्तर्गतका १३ जिल्लाका स्वास्थ्य सेवालाई समन्वय गर्न सामाजिक विकास मन्त्रालयअन्तर्गत पाँचवटा प्रदेश स्वास्थ्य कार्यालय स्थापना गर्न लागेको छ। स्वास्थ्य मन्त्रालयले आफूअन्तर्गतका स्वास्थ्य संस्थाहरु स्थानीय तहलाई हस्तान्तरण गरिसकेको छ। रासस

फेसबुक मार्फत कमेन्ट गर्नुहोस् ।