आफ्ना मान्छे फस्ने भएपछि सरकारले वाइडबडीमा देउवाको नाम जोड्यो – नेता केसी

 शम्भु गौतम     २१ माघ २०७५, सोमबार

नुवाकोट, माघ २१

प्रमुख प्रतिपक्षी दल नेपाली कांग्रेसका नेता अर्जुननरसिंह केसीले सरकारले आफ्ना मान्छे फस्ने भएपछि वाइडबडी प्रकरणमा पूर्वप्रधानमन्त्री शेरबहादुर देउवाको नाम मुछेको दाबी गरेका छन् । सरकारविरुद्ध नुवाकोटमा आयोजित विरोध सभालाई सम्बोधन गर्दै नेता केसीले आफ्ना मान्छेलाई जोगाउन सरकारले कांग्रेस सभापति तथा पूर्वप्रधानमन्त्री देउवाको नाम मुछेको दाबी गरेका हुन् ।

‘‘सरकारले वाइडबडी काण्डमा आफ्ना धेरै जसो मन्त्री र नेताहरु पर्ने भएपछि हाम्रा नेताहरुको समेत संग्लनता छ भनेर हल्ला गरिरहेको छ,’’ उनले भने, ‘‘सरकारको तागत छ र यदि साँच्चिकै कांग्रेसका नेताहरुको वाइडबडी विमान खरिदमा ंसग्लनता छ भने कारवाही गरेर देखाउन चुनौती दिन चाहन्छु ।’’

नेता केसीले छानविनका क्रममा कांग्रेसका जुनसुकै तहका नेता संलग्न देखिए पनि भ्रष्टचारीलाई नबोक्ने स्पष्ट पारे । सुन भनेर समातेको वस्तु तामा निस्किएको प्रसंगप्रति लक्षित गर्दै उनले प्रश्न गरे, ‘‘३३ किलो सुनसमेत कतै तामाकै मूल्यमा सिंहदरवार र बालुवाटारमा भागबण्डा भएकै कारणले दोषीलाई कारबाही नगरिएको त होइन ?’’

नुवाकोट कांग्रेसका सभापति जगदिश्वरनरसिंह केसीले महँगी र भ्रष्टचारले रंगिएकाले नेकपा नेतृत्वको सरकारको विरोध गर्नुपर्ने बताए । सुनकाण्डमा निर्दाेष प्रहरीहरु फसाएको भन्दै उनले सिंहदरवार र बालुवाटारबाट शक्तिको आडमा दमभ देखाइरहेकाहरु नै सुनकाण्ड, वाइडबडी काण्ड र निर्मला पन्तको बलात्कारपछि भएको हत्याकाण्डमा संलग्न रहेको आरोप लगाए ।

बारखरीबाट साभार

फेसबुक मार्फत कमेन्ट गर्नुहोस् ।