औद्योगिक प्रयोजनमा ग्यासको मूल्य ६ सय रुपैयाँ बढाउन उपसमितिको सिफारिस

असार, २८, काठमाडौं/औद्योगिक प्रयोजनको लागि खाना पकाउने ग्यासमा सहुलियत दिन आवशयक नभएको सिफारिस सरकारलाई गरिएको छ । खाना पकाउने ग्यासको मूल्यबारे अध्ययन गर्न गठन गरिएको  उपसमितिले औद्योगिक प्रयोजनको लागि लागत मूल्यमै ग्यास बिक्री गर्न सिफारिस गरेको हो ।

अहिले सरकारले एक सिलिन्डर ग्यासमा ५ सय ७१ रुपैयाँ छुट दिएको छ । आयल निगमले आफ्नो लागतअनुसारको मूल्य लिँदा औद्योगिक प्रयोजनको लागि २३ सय ७१ रुपैयाँ प्रतिसिलिन्डर ग्यासको मूल्य पर्न जाने बताइएको छ ।

विद्युतीय उर्जा प्रयोगलाई प्रोत्साहन दिएर ग्यासको उपयोग घटाउने नीति सरकारको छ । साथै सरकारको तर्फबाट दिइएको सहुलियत क्रमश घटाउँदै लैजाने विषय आगामी आर्थिक वर्षको नीति तथा कार्यक्रममा समेत उल्लेख गरिएको छ ।

गुणस्तर तथा नापतौल विभागका महानिर्देशक दिनानाथ मिश्रको संयोजकत्वमा बनेको उपसमितिले परल मूल्यमा ग्यास बिक्री गर्नको लागि सरकारलाई सिफारिस गरेको हो । तर घरायसी र औद्योगिक प्रयोजनको ग्यास सिलिन्डरको कलर र साइज पनि छुट्टा-छुट्टै गर्नको लागि सिफारिस पनि उपसमितिले सिफारिस गरेको छ । घरायसी प्रयोजनको लागि भने अहिलेको सहुलियत निरन्तर दिइनु पर्ने उपसमितिको सुझाव छ ।