प्रदेश सभा को बैठक सुचारु गराउन सर्वदलिय बैठक बस्दै

हेटौडाः  बागमती प्रदेशसभा बैठक सञ्चालनका लागि आज सर्वदलीय बैठक बस्दै छ ।  प्रदेश सभाको बैठक लामो समयदेखि सुचारु हुन नसकको सन्दर्भमा सभामुख भुवन पाठकले सर्वदलीय बैठक बोलाउनु भएको हो ।
सभामुख पाठकले आइतबार बिहान १० बजेका लागि सर्वदलीय बैठक बोलाउनु भएको बागमती प्रदेश सभा सचिवालयले जनाएको छ ।  उहाँले प्रदेश सभामा प्रतिनिधित्व गर्ने दलहरूका संसदीय दलका नेता, सचेतक तथा प्रतिनिधिहरूलाई उपस्थित हुन पत्राचार गर्नु भएको छ ।  बैठकमा सहमति जुटेमा आज बिहान ११ बजेका लागि बोलाइएको बैठक सञ्चालन हुनेछ ।  गत २ महिनादेखि प्रदेश सभा बैठक बस्न सकेको छैन ।
चालु आर्थिक वर्ष २०८०/०८१ को बजेट पारित गर्दाको समयमा विपक्षी दलहरूसँग गरेको सहमति कार्यान्वयन गर्न माग गर्दै प्रदेश सभा सञ्चालनमा एमाले र राप्रपाले अवरोध गरिरहेकाछन् । तर सरकार भने प्रतिपक्षसँगको सहमति कार्यान्वयन गर्न सकारात्मक रहेको बताउँदै आएको छ । सरकारले प्रतिपक्षको माग सम्बोधन गर्ने गरी सम्झौता अनुसार एमालेलाई ४५ करोड रुपैयाँ र राप्रपालाई २५ करोड रुपैयाँको योजना तथा कार्यक्रम बजेटमा समावेश गर्ने गरी मन्त्रिपरिषद् बैठकबाट निणर्य गरिसकेको बताउने गरेको छ । राजनीतिक दलहरुको जुँगाको लडाईँले सर्वसाधारणका समस्या बारेमा प्रदेश सभामा छलफल हुन सकेको छैन ।