१९औं एसियाली खेलकुद : मंगोलियामाथि नेपालको सानदार जित

काठमाडौं । १९औं एसियाली खेलकुदअन्तर्गत पुरुष क्रिकेटमा नेपालले २ सय ७३ रनको विशाल अन्तरले विजयी भएको छ ।

पहिलो पटक अन्तर्राष्ट्रिय मैदानमा उत्रिएको मंगोलिया बलिङ र फिल्डिङतर्फ कमजोर प्रदर्शन गरेसँगै नेपालले अहिलेसम्मकै फराकिलो जित हासिल गरेको हो । यसअघि चेक गणतन्त्रले टर्कीमाथि २५७ रनको जित हात पारेर रन अन्तरको हिसाबमा सबैभन्दा फराकिलो जितको विश्व कीर्तिमान बनाएको थियो ।

पहिले ब्याटिङ गरेको नेपालले निर्धारित २० ओभरमा तीन विकेट गुमाउँदै मंगोलियालाई तीन सय १५ रनको लक्ष्य दिएको थियो । मंगोलिया १३.१ ओभरमा ४१ रनमै अलआउट भयो । मंगोलियाको अन्तर्राष्ट्रिय क्रिकेटमा डेब्यू खेल हो । मंगोलियापछि नेपालले आइतबार माल्दिभ्ससँग खेल्नेछ ।