इराकको विवाह समारोहमा आगलागी : कम्तीमा १ सयको मृत्यु

काठमाडौं । उत्तरी इराकको एक विवाह समारोहमा आगलागी भएको छ । इराकको निनेभ प्रान्तको अल–हमदानिया जिल्लामा मंगलबार राति आगलागी हुँदा कम्तीमा सय जनाको मृत्यु र १५० जनाभन्दा धेरै घाइते भएका छन् ।

भवन निर्माण गर्न प्रयोग भएको प्रज्वलनशील प्यानलले आगलागीलाई थप भीषण बनाएको र यसले गर्दा भवनको छत खसेको आशङ्का गरिएको छ । प्रारम्भिक रिपोर्टमा आतिशबाजी पछि आगलागी सुरु भएको प्रत्यक्षदर्शीले जनाएका छन् ।

प्रत्यक्षदर्शीका अनुसार सयौँ मानिसहरू विवाह समारोहमा रमाइलो गरिरहेका बेला स्थानीय समयअनुसार राति १०ः४५ बजे आगलागी सुरु भएको थियो । मृतक र घाइतेको यकिन सङ्ख्या आइनसकेको र यो सङ्ख्या अझै बढ्न सक्ने स्थानिय सञ्चारमाध्यमहरुले प्रकाशन गरेका छन् ।