दोलखामा ४ किलो तस्करीको सुन सहित ३ जना पक्राउ

दोलखाको सिंगटीबाट प्रहरीले ४ किलो तस्करीको सुन सहित ३ जनालाई पक्राउ गरेको छ।

सिंगटी बजारबाट ३ जनालाई गए राती पक्राउ गरिएको र उनीहरूको साथबाट ४ किलो तस्करीको सुन बरामद गरिएको  जिल्ला प्रहरी कार्यालय दोलखाका प्रमुख डिएसपी दीपक खड्काले जानकारी दिए।

पक्राउ परेका तीनै जना व्यक्तिहरुको पहिचान खुलेको छ । स्रोतका अनुसार पक्राउ पर्नेमा विगु गाउँपालिका–१, स्यालुका केशर तामाङ, लामाबगरका राज तामाङ र लामाबगर गोंगरका माधव मगर रहेका छन् ।

उनीहरूले तिब्बती सीमा लामावगर नाकाबाट तस्करीको सुन भित्र्याएको आशंका गरिएको छ।लामावगर तर्फको एउटा नाका चिन सरकारले गत साता मात्र खुलाएको थियाे । 
पैदलमार्गबाट सुन भित्रिएको अनुमानका आधारमा प्रहरीले उक्त क्षेत्रमा निगरानी बढाएको छ ।
बिहीबार (आज) प्रहरीले पत्रकार सम्मेलन गरी यस विषयमा जानकारी गराउने तयारी गरेको छ । आइतबारदेखि चीनको रोङजिया र क्वादम सीमा नाका चीनले खोलिदिएको थियोे। चीनले बन्द गरेको लप्ची नाकाबाटै तस्करले सुन भित्र्याएको हुन सक्ने प्रहरी स्रोतको भनाइ छ।