नेपाल सम्वत् ११३७ प्रारम्भ, विविध कार्यक्रम गरी मनाइँदै

 आवाज संवाददाता     १५ कार्तिक २०७३, सोमबार

१५ कात्तिक, काठमाडौँ । नेपाल सम्वत् ११३७ आज देशभर विविध कार्यक्रम गरी मनाइँदैछ । यस संवत्लाई हाल नेवार समुदायले नयाँ वर्षका रुपमा मनाउने गरेका छन् ।

राष्ट्रिय विभूति शंखधर साख्वाले विसं ९३७ (इ सं ८८०) मा गरिब जनताको ऋण मोचन गरी नेपाल संवत्को शुरुवात् गराएका थिए ।  नेपाल संवत्ले पृथ्वीनारायण शाहको शासनकालसम्म राष्ट्रिय संवत्को मान्यता पाएको लुम्बिनी बौद्ध विश्वविद्यालयका पूर्व उपकुलपति डा त्रिरत्न मानन्धरले जानकारी दिए ।

मानन्धरका अनुसार “लिच्छविकालका राजा राघवदेवको शासनकालबाट सुरु भएको नेपाल संवत् पृथ्वीनारायण शाहको शासनकालसम्म मौलिक संवत्का रुपमा चलेको थियो, लिच्छविकाल अघि शक संवत् प्रचलनमा थियो, नेपाल देशको नामबाट राखिएकाले यो मौलिक संवत् हो । ”

विसं २००७ सालमा प्रजातन्त्रको स्थापना भएपछि देखि नै नेपाल संवत्लाई राष्ट्रिय मान्यताका लागि अभियान चलाइएको थियो ।

नेपाल संवत्को नयाँ वर्ष काठमाडौँ, ललितपुर, भक्तपुर, बनेपा, धुलिखेल, बाह्रबिसे, दोलखा भीमेश्वरलगायतका नेवार समुदायको बाहुल्यता रहेका स्थानमा बिशेषरुपमा मनाउने गरिन्छ ।

गरिब जनताको ऋण मोचन गराई सामाजिक सेवाको उत्कृष्ट नमूना प्रस्तुत गरेको र नेपालमा मौलिक संवत्समेत चलाएको कार्यको उच्च मूल्याङ्कन गर्दै विसं २०५६ सालमा नेपाल संवत्को नयाँ वर्षका दिनमा तत्कालीन प्रधानमन्त्री कृष्णप्रसाद भट्टराईले साख्वालाई राष्ट्रिय विभूति घोषणा गगरेका थिए ।

विसं २०६५ मा तत्कालीन प्रधानमन्त्री पुष्पकमल दाहालले नेपाल संवत्ले राष्ट्रिय मान्यता पाउने घोषणा गर्नुभएको थियो । कार्तिक कृष्ण औँसीका दिन बहीखाता बन्द गरी नयाँ वर्ष अर्थात् कार्तिक शुक्ल प्रतिपदाका दिन नयाँ बही खाताको सुरुवात् गर्ने परम्परासमेत काठमाडौँमा छ ।

दोलखामा पनि नयाँ वर्ष मनाइयो

यसैगरी दोलखा सदरमुकाम चरिकोटमा पनि नेपाल संवत् ११३७ मनाइएको छ । सदरमुकाम चरिकोटमा आज विहान धिमे बाजासहित प्रभातफेरी गरिएको छ । दोलखामा धिमे बाजा बजाइएको पहिलोपटक हो । प्रभातफेरीपछि पशुपतिचोकस्थित पशुपति कन्या मन्दिर माविको प्राङ्गणमा ‘समयबजी’ सहित शुभकामना आदानप्रदान गरिएको थियो । कार्यक्रममा जिल्लास्थित कार्यालयका प्रमुखहरु, स्थानीय संस्थाहरुका प्रतिनिधि तथा बजारका स्थानीयहरुको सहभागिता थियो ।

अनलाइनखबरको सहयोगमा

फेसबुक मार्फत कमेन्ट गर्नुहोस् ।



CDF