रुँदै बिदा भएकी फिलिपिनो ‘जोया’ फेरि नेपाल फर्किइन्

 आवाज संवाददाता     २ मंसिर २०७३, बिहीबार

काठमाडौं–लगभग ३ महिनाअघि नेपालबाट फर्काइएकी फिलिपिनी महिला जोया र उनका बच्चाहरु मिगेल र एरिक गत शुक्रबार नेपाल आएका छन् ।
चितवनका जीवन मगरसँग वैवाहिक सम्बन्धमा रहेर २ सन्तान भइसकेको भए पनि नेपालमा भिसाबिना बसेकाले र प्रशासनमा जीवन जोयाको बिहे दर्ता र बच्चाहरुको जन्म दर्ता हुन् नसकेकाले चितवनको आदर्श होम नामक संस्थाको सक्रियतामा फिलिपिनी कन्सुलेटको सहायतामा गत अगस्ट १५ मा जोयासहित उनका २ बच्चाहरु पनि फर्काइएको थियो ।
नेपाली बाबु मार्फत नेपालमै जन्मेका ती २ बच्चाहरुलाई आमासँगै फिलिपिन्स पठाइएपछि घोर अन्याय भएको भन्दै संसारभर छरिएर रहेका नेपालीहरु आक्रोशित बनेका थिए र जोयालाई तुरुन्त नेपाल फर्काउनुपर्ने आवाज उठाए ।
अझ सञ्चारमाध्यममा प्रसारित जोयाको निष्कपट अन्तर्वार्ता, श्रीमान र परिवारप्रतिको स्नेह र सम्मान, सन्तानप्रतिको अथाह वात्सल्य प्रेम, नेपाल र नेपालप्रतिको सम्मान र ५ वर्षपछि पुनः पैसा कमाई नेपाल फर्किने आदम्य प्रतिबद्धता देखेर संसार भरका नेपालीको आँशु थामिएन ।

नेपाली समाजको अपेक्षा विपरीत उनको आदर्श विचार देखेर उनलाई उच्च सम्मान गर्दै ‘‘नेपालकै बुहारी’ नामकरण गरियो । जोयाका नाममा कैयन चिट्ठी, कविता, लेख, रचना फेसबुक, पत्रपत्रिका, अनलाइन साइट आदिमा प्रकाशित भए । थुप्रैले स्टुडियोमै गएर जोयाको नाममा गीत नै रेकर्ड गराए ।
सुरुमा पति जीवनले नहेरेकाले जोयालाई उद्धार गरी फिलिपिन्स फर्काइएको भनिए पनि जोया गएको केही दिनमै एक मिडिया मार्फत जीवनका आमा, छिमेकी र स्वयं जीवनले आफूहरुको सम्बन्ध राम्रै भएको तर गरिबीले गर्दा समस्या निम्तिएको भन्दै मिडियामा बताएपछि संसारभरबाट जोया र जीवनको पुनर्मिलन र जोया र नानीहरुको नेपाल फिर्तीका लागि अभियान सुरु भयो ।

यस क्रममा सामाजिक अभियन्ताहरु नवीन जङ्ग र हङ्कङ्ग निवासी नवांग शेर्पाले ‘‘जोया नेपालकी बुहारी” नामक फेसबुक मार्फत संसार भरका नेपालीहरुलाई सङ्गठित गर्दै सहयोग जुटाए भने नेपालमा नेपाल मगर सङ्घ र डीके मिडियाले जोयाको जीवन घटनाबारे छानविन सुरु गर्यो । जोयाको घर ठेगामा पत्ता लगाउन नविन जङ्ग र डियोन थापाले कैयन दुःख गरे । अनि व्यक्तिगत रकम पठाएर जोयालाई विश्वासमा लिई जोयासँग सम्पर्क स्थापित गर्न सफल भए ।
‘‘नो दलाल डाइरेक्ट ट्रान्सफर, जो पीडित उसकै नाममा खाता” नाराका साथ नवीन जङ्ग र नवांग शेर्पाले सुरु गरेको अभियानमा झन्डै १५ लाख जुट्यो ।

उता जोया जीवनको घटना हेरिसकेपछि गरिब र चोखो मायाका जोडीमाथि अन्याय भएको जिकिर गर्दै अमेरिका निवासी कामी शेर्पाले पनि जोया फर्काऊ अभियान सुरु गरे । जसअन्तर्गत उनले झन्डै १० लाख रुपियाँ जुटाएका छन् । यो जोया नेपाल फर्किसकेपछि केही उद्यम गर्नका लागि प्रयोग गरिने निर्णय भएको छ ।

एउटै उद्देश्यका साथ सुरु भएको कामी शेर्पा र नवीन जङ्गको अभियानमा सहकार्य सुरु भयो ।

जीवनको पासपोर्ट चितवन प्रशासनबाट निकाल्नेदेखि जीवनको विवाह, जीवनमाथि लागेका आरोपको खण्डन गर्दै सत्यतथ्य बाहिर ल्याउने कार्यमा कामी शेर्पाको ठूलो भूमिका रह्यो ।
जीवन मगर आफ्ना मामा कामे मगरसँगै जोया र बच्चाहरुलाई फर्काउन १६ सेप्टेम्बरमा जीवन फिलिपिन्स उडेका थिए । सोही दिन बकोलोडबाट मनिला आई जोया र जीवनको पुनर्मिलन भएपश्चात १७ सेप्टेम्बरमा उनीहरु जोयाको माइती घर बकोलोड उडेका थिए ।

बकोलोड पुगेपछि १ अक्टोबरमा जोया जीवनको विवाह सम्पन्न भयो । त्यस पश्चात जोयाको आईडी, पासपोर्ट, छोराहरु मिगेल र एरिकको ट्राभल डकुमेन्ट बनाउने काम सुरु भयो ।
मलेसियास्थित नेपाली दूतावासले मिगेल र एरिकको ट्राभल डकुमेन्ट बनाई मनिलास्थित नेपाली कन्सुलेट मार्फत जोयाको घरमै ट्राभल डकुमेन्ट पठाई सहयोग गरेको थियो ।
यस बीचमा जीवनलाई फिलिपिन्सको अध्यागमन, नेपाली कन्सुलेट र भारतीय दूतावासले पटक पटक सोधपुछ गरेको थियो ।

जीवनसँगै एक महिना बढी फिलिपिन्स बसेका कामे मगरले निकै मिहिनेत र बुद्धिमत्ताका साथ बिहे दर्ता, जोयाको पासपोर्ट, बच्चाहरुको ट्राभल डकुमेन्ट आदि बनाएका थिए ।
यसरी फिलिपिन्समा सबै कुरा मिलेर नेपाल आउन तयार भइसकेपछि पनि जोयालाई नेपालबाट फर्काइँदा उनलाई ३ वर्षसम्म नेपाल प्रवेशमा लागेको प्रतिबन्ध भने फुकुवा हुन सकेन ।
विविध कारणवश प्रतिबन्ध फुकुवा गर्न नमिले पनि जोया स्वयं नेपालको अध्यागमनमा आइपुगेको अवस्थामा भने परिवारको रोहबरमा छाड्न सकिने झिनो सम्भावना बताइयो ।

नेपालमा प्रतिबन्ध खुलाउन ओखलढुङ्गा–१ का काङ्ग्रेस नेता पेमानिमा शेर्पाले निकै दौडधुप गरेका थिए भने डीके मिडियाका पत्रकार महेश रानाले पनि निकै मिहिनेत गरे ।
फुकुवा हुने आशामै दसैँ तिहार बित्यो । यसबीच जीवन र मामाको भिसा पनि सकिन लागेको र बच्चाहरुको ट्राभल डकुमेन्ट पनि एक्सपायर हुनलागेपछि अभियन्ताहरु बीच छलफल गरी १० तारिखमा जसरी पनि फिलिपिन्सबाट उड्ने तय भयो ।

सोही अनुरुप उनीहरु १० तारिखमा मनिलाबाट इत्तियाड एयर मार्फत दुबई उडे र ११ तारिखको साँझ ५ बजे नेपाल ओर्लिए । पारिवारको रोहबरमा विशेष निगरानीमा रहने गरी जोयालाई नेपाल प्रवेश अनुमति दिइएको छ । हाल उनी पर्यटक भिसामा नेपाल भित्रिएका छन् ।

यसरी विभिन्न मनकारी व्यक्तिहरुको सहयोगले एउटा गरिब परिवारको उद्धार भएको छ भने नेपाली बाबु मार्फत नेपालमै जन्मेर झन्डै पनि विदेशी बन्न लागेका २ बच्चाहरुको नागरिक अधिकार दिलाउने कार्य सफल भएको छ ।

अब केही दिनमै जोया र जीवनले नेपालमा कानुन सङ्गत ढङ्गले विवाह दर्ता गर्नेछन् भने बच्चाहरुको जन्मदर्ता पनि गर्नेछन ।
नेपाल फर्की सकेको सन्दर्भमा न्युयोर्कमा कामी शेर्पाले जुटाएको झन्डै १० लाख रुपियाले जोया जीवनको परिवारका लागि केही उद्यम खोलिदिने भएको छ । लगातार ३ महिनासम्म ५० लाखभन्दा बढी नेपालीहरुलाई उद्वेलित पारिराखेको यो घटनालाई जनतासामु लैजान नेपालका राष्ट्रिय अनलाइन र छापा मिडियाहरुलाई आग्रह गरे पनि कसैले चासो नदिएको अभियन्ताहरुले बताए ।

लाखौं नेपालीको सहयोगले देशनिकालामा परेका नेपालका छोराहरु मिगेल र एरिक अनि बुहारी जोया नेपाल फर्किसकेका छन् । यस परिवारले आगामी दिनमा कुनै मुद्दा मामिलामा नलागी सामान्य जीवन यापन गर्न सकून् ।

Source:ratopati.com

फेसबुक मार्फत कमेन्ट गर्नुहोस् ।



CDF