सामुदायिक मेलमिलाप केन्द्रबाट १ सय ६१ विवाद समाधान

 आवाज संवाददाता     २० मंसिर २०७३, सोमबार

दोलखा / सामुदायिक मेलमिलाप केन्द्र मार्फत दोलखा जिल्लामा १ सय ६१ वटा विवाद समाधान भएको प्राकृतिक श्रोत द्वन्द्व रुपान्तरण केन्द्र (एनआरसिटीसी), नेपाल दोलखाले जनाएको छ । चरिकोटमा आज आयोजित सामुदायिक मेलमिलाप सम्बन्धि जिल्लास्तरिय दोश्रो अनुभव आदानप्रदान कार्यक्रममा संस्थाका जिल्ला कार्यक्रम संयोजक ताराबहादुर महतले जिल्लाका विभिन्न मेलमिलाप केन्द्रमा गत कार्तिक महिनासम्म देवानी प्रकृतिका १ सय ८० वटा विवाद दर्ता भएकोमा १ सय ६१ वटा विवाद समाधान गरिएको जानकारी दिनुभयो । उहाँका अनुसार जिल्लाका ४४ वटा गाविसमा सामुदायिक मेलमिलाप केन्द्र स्थापना गरिएको छ भने बाँकी गाविस नगरपालिकामा पनि निकट भविष्यमै केन्द्र स्थापनाको तयारी गरिएको छ ।
गत बर्ष सन् २०१५ को सेप्टेम्बरबाट एनआरसिटीसी नेपालद्वारा स्थानिय निकायको सहकार्यमा दोलखामा सञ्चालित सामुदायिक मेलमिलाप कार्यक्रम अन्र्तगत विभिन्न गाविसमा स्थापना भएका मेलमिलाप केन्द्रमार्फत मेलमिलापकर्ताहरुले विवाद समाधान गर्ने गरेका छन । संस्थाले प्रत्यक गाविसको ६ जना र नगरपालिकाको १२ जनाका दरले हालसम्म ३ सय जनालाई मेलमिलापकर्तालाई मेलमिलाप सम्बन्धि आधारभुत तालिम प्रदान गरेको जनाईएको छ ।
सामुदायिक मेलमिलाप कार्यक्रम अन्र्तगत गठित जिल्लास्तरिय संवाद समितिका संयोजक तथा सहायक प्रमुख जिल्ला अधिकारी बालकृष्ण कटुवालको अध्यक्षतामा सम्पन्न कार्यक्रममा दोलखा जिल्ला अदालतका न्यायाधिश लालकाजी श्रेष्ठले मेलमिलापबाट विवाद समाधान गर्न सकेमा सम्पुर्ण समुदायलाई लाभ हुने भन्दै मेलमिलापको महत्वबारे आम नागरिकलाई सचेतना फैलाउनुपर्ने बताउनुभयो । त्यसैगरी संवाद समितिका संयोजक समेत रहनुभएका सहायक प्रमुख जिल्ला अधिकारी कटुवालले मेलमिलाप केन्द्रले सामान्य प्रकृतिका विवाद स्थानिय तहमै समाधान गर्न सकेमा अन्य निकायलाई पनि सहयोग पुग्ने बताउनुभयो । कार्यक्रममा एमाले दोलखाका उपसचिव डबल पाण्डे, नेपाली काङ्ग्रेस प्रतिनिधि उर्मिला कार्की, राप्रपा दोलखाका अध्यक्ष बलबहादुर तामाङ, नयाँ शक्ति नेपाल दोलखाका सचिव सन्तोष राउत, प्रहरी निरिक्षक ललनप्रसाद कुर्मी, जिल्ला बाल कल्याण समिति सदस्य इश्वर बहादुर थापा, मानवअधिकार एलायन्सका कुमार लगुन, गैर सरकारी संस्था महासंघ दोलखाका सचिव दिलबहादुर के.सी, भिमेश्वर नगरपालिकाका प्रतिनिधि भिमबहादुर बस्नेत, सामुदायिक वन उपभोक्ता जिल्ला महासंघ दोलखाकी अध्यक्ष कमला बस्नेत जिल्लास्थित विभिन्न सञ्चारमा कार्यरत पत्रकार, नागरिक समाज, मेलमिलापकर्ता लगायतको सहभागिता रहेको थियो ।

फेसबुक मार्फत कमेन्ट गर्नुहोस् ।