कलाकारहरुले स्कुल बनाए, मन्त्रीले गरे उद्घाटन (फोटो फिचरसहित)

 आवाज संवाददाता     १० असार २०७३, शुक्रबार

दोलखा, असार १०/शिक्षामन्त्री गिरिराजमणि पोखरेलले गत वर्षको विनासकारी भूकम्पले क्षति भएका विद्यालय भवन तथा कक्षाकोठाहरु तीन वर्षभित्र निर्माण गरिसक्ने दावी गरेका छन् ।

IMG_20160624_122610
सुन्द्रावती गाविस ८ को सरस्वती प्राविको नवनिर्मित भवनको उद्घाटन गर्दै मन्त्री पोखरेलले सरकारले भूकम्पबाट क्षतिग्रस्त भएका विद्यालय सरकारको पहिलो प्राथमिकतामा रहेको दावी गरे । सुन्द्रावती स्थायी घर भएका गीतकार सुदीप रेग्मी र प्रसिद्ध गायक प्रमोद खरेलको विशेष पहलमा निर्मित ५ कोठे भवनको मन्त्री पोखरेलले आज उद्घाटन गरेका हुन् ।

IMG_20160624_122619

चर्चित कलाकार तथा संगीत क्षेत्रका व्यक्तिहरुको पहल र उपस्थितिमा भएको विद्यालय उद्घाटन कार्यक्रममा मन्त्री पोखरेलले कलाकारहरुको प्रशंसा गर्दै मुलुकका विद्यालय र कक्षाकोठा निर्माणका लागि उनीहरुको थप सहयोगको अपेक्षा पनि गरे । उनले मुलुकभर ८ हजार विद्यालय क्षतिग्रस्त भएको बताए । शिक्षा क्षेत्रलाई प्राथमिकता दिएर विद्यालय भवन निर्माण गरेकोमा कलाकारहरुको सराहाना गर्दै मन्त्री पोखरेलले भने, ‘तपाईँहरुको काम प्रशंसनीय छ, यसलाई निरन्तरता दिँदै सरकारलाई साथ दिनुहोस् ।’

IMG_20160624_122642

भवन निर्माणको संयोजन गर्ने गीतकार सुदीप र गायक प्रमोदले सुन्द्रावतीका अन्य विद्यालय भवन पनि बनाइदिन पहल गर्ने बताए । विद्यालयका प्रधानाध्यापक प्रह्लाद प्रसाद पकुवालले कलाकारहरुले उपलव्ध गराएका १८ लाखको लागतमा विद्यालय भवन निर्माण भएको बताए ।

IMG_20160624_122719

विद्यालय भवन हस्तान्तरण कार्यक्रममा कलाकारहरु किरण केसी, शिवहरि पौडेल, जितु नेपाल, संगीतकार चेतन सापकोटा, गायक प्रमोद खरेलका साथ नेपाली कांग्रेसका केन्द्रीय सदस्य विश्वप्रकाश शर्माको पनि उपस्थिति थियो ।

 

फेसबुक मार्फत कमेन्ट गर्नुहोस् ।