जिरी नगरपालिकाको जोड पर्यटन विकास

 आवाज संवाददाता     २७ असार २०७४, मंगलवार

दोलखा, २७ असार
जिरी नगरपालिकाले पर्यटन विकासमा जोड दिंदै पहिलो नगर सभा सम्पन्न गरेको छ । पर्यटकीय नगरीको पहिचान बनाएको नगरपालिकाको मंगलबार सम्पन्न भएको नगर सभाले पर्यटन र कृषि क्षेत्रको विकासबाट नै सम्वृद्ध जिरी बनाउने गरी नीति तथा कार्यक्रम सहितको बजेट प्रस्तुत गरेको हो ।
पूर्वी दोलखाको जिरी नगरपालिकालाई क्लीन जिरी ः ग्रीन जिरी बनाउने योजना पास गरेको छ । नगरपालिकाकाले ‘क्लीन जिरी ः ग्रीन जिरी’को नारालाई व्यवहारमा उतार्न जिरी नगरलाई प्लाष्टिक रहित अर्गा्निक जिरीको रुपमा पहिचान स्थापित गर्ने कार्यक्रम अघि सारेको छ ।
जिरी नगरपालिकाको मंगलबार सम्पन्न नगर सभामा नगर उपप्रमुख कृष्णमाया बुढाथोकीले आगामी आर्थिक बर्षका लागि लागि कूल रु. २४ करोड ९७ लाख ७२ हजार बराबरको बजेट प्रस्तुत गरेकी हुन् । प्रस्तुत बजेटमा पूँजीगत तर्फ रु. १३ करोड, चालु तर्फ रु. २ करोड ६७ लाख ७० हजार र सशर्त अनुदान तर्फ रु. ९ करोड ३० लाख २ हजार रहेको छ । नगर सभामा चालु आर्थिक बर्षका लागि पूँजिगत तर्फ रु. ६ करोड ७५ लाख ५७ हजार र चालु खर्चतर्फ रु. ९१ लाख गरी कूल रु. ७ करोड ६६ लाख ५७ हजार बराबरको संशोधित बजेट पेश गरिएको छ ।
नगरपालिकाले आन्तरिक आम्दानी तर्फ ५१ लाख ७० हजार आम्दानी हुने प्रक्षेपण गरेको छ । जस अनुसार आन्तरिक कर तथा राजस्व ८ लाख र राजस्व बाँडफाँड तथा रजिष्ट्रेशन दस्तुरवाट ८ लाख तथा नेपाल सरकारवाट २४ करोड ३० लाख २ हजार अनुदान प्राप्त हुने अनुमान छ ।
जिरी नगरपालिकाले कृषी, पर्यटन प्रवद्र्धन, भौतिक निर्माण तथा पूर्वाधार विकासका अलावा, शिक्षा, स्वास्थ्य, सामाजिक विकास, सुशासन तथा संस्थागत विकासलाई पनि प्राथमिकतामा राखेको छ । जिरीले पर्यटन प्रवद्र्धनमार्फत नगरवासीको आयआर्जन बृद्धि गर्ने नीति लिएको छ । जस अनुसार होम स्टे, धार्मिक स्थलको विकास, प्याराग्लाईडिङ, हाईकिङ तथा ट्रेकिङ रुट स्थापनाको सम्भाव्यता अध्ययन गर्ने योजना छ ।
जिरी नगरपालिकाले जिरी एयरपोर्टको निर्माण तथा सञ्चालन, शीत भण्डारकेन्द्र निर्माण, खावाडाँडामा पर्यटन सुचना केन्द्र स्थापना, भ्यु टावर निर्माण लगाएतको योजना पनि अघि सारेको छ । नगरपालिकाले जिरी, चेर्दुङ, जटापोखरी तथा च्छोरोल्पा ट्रेकिङ रुट निर्माण गर्ने लक्ष्य लिएको छ । पर्यटकीय नगरी जिरीको हनुमन्तेडाँडामा हनुमानको मूर्ति निर्माणका लागि सार्वजनिक नीजि साझेदार तथा निजी लगानीमैत्री वातावरण सिर्जना गर्ने नगरपालिकाको योजना छ ।
सभालाई सम्बोधन गर्दै जिरी नगरपालिकाका नगर प्रमुख टंक जिरेलले जिरीलाई नेपालकै नमुना पर्यटकीय नगर बनाउने उद्ध्घोष गरे । उनले आफ्नो ५ बर्षे कार्यकालमा पर्यटनका लागि आवश्यक पुर्वाधार निर्माण गरिसकेर जिरीलाई स्वदेशी तथा बिदेशी पर्यटकको रोजाईको नगर बनाउने बताए ।

फेसबुक मार्फत कमेन्ट गर्नुहोस् ।